حداد

اريد اعلن حداد وللعشك ماعود
واريد انساك ونسة البينك اوبيني
واشك دفتر غرامك خاطر انةانساك
وادير الوجه عنك من تلاكيني
ماريدك بعد لوانت روحي اتصير
اوماريدك لون من موت تحييني
ملح بعيوني احطن ونسة حتى النوم
اخافن بلمنام طيوفك اتجييني
اذا شافتك عيني اوفرحت ابملكاك
والله اتبره منهه اوهاي موعيني
وذا صافحك جفي ابحجة الخملان
اكص اثنين اديه ايساري ويميني
وذا كالولي حبك يسري بلشريان
ثق بالله اكطع كل شراييني
وذا صاير شمس انه ابقه دوم ابليل
اوماريد الضوة اوبلظلمه خليني
تذكر من لكيتك والعطش واليك
اوكلتلي امعود اترجاك روييني
عصرت اجفون عيني اووشلييت دموع
اوشربتك بديه اوانت تدرييني
اومن مرني العطش صرت انت جربة ماي
كصدتك معتني اومديت جفيني
ونتة ابكل وكاحة اوكل صلافة عين
درت بجفوفي سم اوردت تنهيني
تذب نفطك عليه اوانه بيه النار
اوتتحمه اعلناري اوماتطفيني
اوصرت محبس بديك اوكمت بيه اتسوم
ساعة اتبيع بيه اوساعة تشريني
اظل خصمك وفظحك حتى من اتموت
على كبرك اخطن بايك اسنيني