ليش لوحدك من غير جناز........... وياهو الغسلك ويغمض العيون
غريب بنص محطة واوادم اجناب ................ وهلك عنك بعيد شلون يدرون
ال يموت بنص هلة تتهدل هدال................. عليه امه وخواته تطيح الامتون
واشوفك وحدك وانت الكبل جان .................. الجبل والساتر بسدك يلوذون
ملك موتك استعجل لو توانيت.................... ترد لديرتك جان هسة مدفون
ددليني بجوازك لخاطر اقراه ..................واشوف شصارلك بالغربة مسجون
من وحشة الغربة لوحشة الموت .................وشربت الوحشتين بفرد ماعون
عليك امك تعاين بلجن تعود................ وضعنك ما رجع من دون الضعون
عدمن ودعتهة وجيت ليجاي ................... وعليك تناشد ال يرحون ويجون
تريدك عون يل هلتال للشيب................... وانت هسة ضعت وتريدلك عون
وحدك تنعي روحك جنك تكول................ هلي اليوم ضيعوني شلون ينسون
ال مثلك ما يموت وناسة تنسى .................العراق انت العزيز وتنسي شلون
يل حنت جروحك حنة الفاو .....................يل مدفي بقميصك حقل مجنون
يل بالهور دمك لسة موجود...................... ولسة بنهر جاسم بيك يحجون
ال مثلك يا يضل من غير جناز.............. النخل يطلع وراك وية ال يشيعون
المن جابتك للغربة رجليك .....................ومتت لا ناعية ولا ناس يبجون
تكلي الجوع اكلك انت غلطان ..................العراق بخير بعدة ولسة مامون
صحيح الجوع كافر من يمر بيك ..............وانا مجربة واعرفة شلون ملعون
حافي وساوموني وكلت ما ابيع ...............وشلت غيرة هلي العشرين مليون
اثبت لا تهزك رعشة العوز.................... الشدايد سم صبر واتعدي وتهون
العراقي شما تلم بيه الملمات.................. جلد على النايبة وبالصبر مدهون
اذا ذيب الوكت ما ننكلب شاة................. ونتانيهة شوكت تكطعنة السنون
غدر طبع الذيابة وهذا معروف................. ومثل هاي النهاية المرة يردون
انا يا صاحبي راجع للعراق...................... اسولف قصتك للي ياشرون
اكلهم النهر ذلة ورة طريبيل.................... وانا خايف عليكم لا تغركون
الوطن هذا الوطن كل شبر محراب.............. كعبة ودنكوا يمة ال يصلون
عراق ومنهو غيرك يرهم وياي .................وانا مطلك الدنية وعايف الكون
ارجو ان تنال اعجابكم
تقبلوا تحياتي محمد الكتلوني
الثلاثاء 13 مايو 2008, 14:14